Cumenzà l'onn da giubileum cun in ferm resultat.

La Banca Chantunala Grischuna ha cuntanschì l'onn da rapport 2019 in ferm resultat. Nus avain pudì mantegnair il gudogn da concern ed augmentar vinavant la productivitad. Contribuì essenzialmain a quest resultat ha la strategia da participaziuns maioritaras a l'Albin Kistler AG ed a la Banca privata Bellerive AG. La banca preschenta ultra dal resultat annual che surpassa las spetgas ina dividenda da giubileum supplementara da CHF 15.0 miu. sco act inizial per il giubileum da 150 onns.

Il 2019 è stà in onn spezial. La surdada da la batgetta a la testa da la banca ha gì lieu parallelamain cun las preparativas per las activitads dal giubileum da 150 onns #gkb2020. Nus ans legrain sin ils projects en quel connex che duain vegnir dabun a tut nossas gruppas participadas. Plaschair avain nus era dals resultats dals studis al martgà fatgs il 2019. La clientella è fitg cuntenta cun la Banca Chantunala Grischuna ch'è vinavant il cler leader sin il martgà. Nus na mettain ussa però betg en crusch ils mauns. Il 2020 vegnin nus tranter auter ad examinar quant persistenta ch'è nossa strategia e la metodica da strategia ed a rinforzar vinavant l'orientaziun als basegns da la clientella.

Persistenza

Pensar ed agir a moda persistenta fa part da la strategia da la BCG. Nus resguardain las midadas en la societad ed ils interess en quel connex da tut nossas gruppas participadas. Questa idea da persistenza implementain nus ord persvasiun en tut las soluziuns d'investiziun. Sco ina da las emprimas bancas avain nus orientà l'entschatta 2020 noss entir mund d'investiziuns a la persistenza. En ils fonds d'aczias e d'obligaziuns da la BCG ed en l'administraziun da la facultad vegn lavurà sulettamain cun products che resguardan criteris ecologics, socials e da governance. En la cussegliaziun d'investiziuns, nua ch'ils clients prendan lur atgnas decisiuns, sustegnain nus els cun recumandaziuns d'investiziun che correspundan medemamain a quests criteris. L'idea da la persistenza vegn damai realisada en l'entir process d'investiziun e betg mo en parts da la paletta da products. La BCG va cun quai in pass pli lunsch che la maioritad da la concurrenza. Er en connex cun la concessiun da credits ed ils checks da ristgas regulars resguardain nus ristgas economicas, ecologicas e socialas. L'enragischaziun locala e la stretga relaziun cun la clientella gidan nus da giuditgar. Gia dapi il 2013 cuvrin nus noss consum da forza electrica cun funtaunas d'energia persistentas, dapi il 2015 essan nus neutrals al clima ed en il rom da noss management d'energia activ sanain nus plinavant successivamain la tecnica d'energia da noss edifizis ed indrizs d'infrastructura

Midada digitala

La digitalisaziun vegn ad esser er il 2020 in dals pli impurtants temas ed in dals facturs da motor per nossa cumpetitivitad futura. I na va dentant betg mo per quai ch'è realisabel, mabain per far diever da las pussaivladads da la digitalisaziun a moda orientada als basegns da la clientella ed a l'utilitad per la clientella. Perquai vegn er il 2020 a star en il center l'optimaziun ulteriura da las colliaziuns digitalas tranter il client e la banca. En quel connex ans concentrain nus sin la cussegliaziun ibrida che collia l'utilitad dal svilup digital cun la cussegliaziun persunala e che pussibilitescha uschia da s'occupar a moda anc pli individuala da la clientella. Ils basegns da la clientella che sa midan cun la digitalisaziun èn er il motiv che nus cuntinuain cun noss concept da filialas cumprovà. Quel pussibilitescha a nus d'impunder en la cussegliaziun persunala resursas che vegnan libras e d'uschia avair dapli temp per nossa clientella. Tar tut las soluziuns digitalas dain nus vinavant gronda attenziun al tema segirtad.

Midada a la testa

Cun Alois Vinzens è sa retratg il 2019 ina persunalitad da la testa da la BCG che ha manà, furmà e consolidà durant 17 onns cun success la banca. En quel temp ha el elavurà sco CEO in mussament da prestaziun excellent sur ils cunfins dal Grischun ora. La direcziun da la banca ha surpiglià Daniel Fust che fa dapi blers onns part da la direcziun da la BCG. El vegn a rinforzar vinavant il focus sin l'orientaziun a la clientella. «Esser là, nua ch'il client è», e quai a moda fisica, digitala e mentala.

En pli vegnin nus vinavant ad ans basar sin nossas valurs cumprovadas. Tuttina vulain nus examinar criticamain l'onn 2020 la strategia e la metodica da strategia da la BCG ensemen cun il cussegl da banca, cun sustegn extern e cun integrar numerus collavuraturs interns. La finamira da quest pass è d'avair il sentiment da dumagnar las sfidas futuras e da pudair cuntinuar cun l'istorgia da success. Cun il nov CEO vegn era Martina Müller-Kamp a prender per mauns ses emprim entir onn sco commembra da la direcziun. En questa funcziun po ella contribuir sia vasta savida, en spezial en il segment da las investiziuns.

Cordial engraziament per Vossa fidaivladad e l'attaschadadad a la BCG. Nus ans legrain dad esser qua per Vus er en l'avegnir.

Daniel Fust

CEO

Peter Fanconi
President da banca