La BCG crescha vinavant.

L'onn 2018 è la BCG creschida danovamain. Cun in gudogn net da 198.0 milliuns francs avant che far reservas ha la banca realisà in gudogn da record. Contribuì a quest resultat ha ina prestaziun da vendita excellenta e l'emprima consolidaziun cumpletta da l'Albin Kistler AG. La banca privata Bellerive AG ha fatg in gudogn da record operativ.

Nus avain cumenzà bain l'emprim semester dal 2018 ed igl è reussì a nus da cuntinuar sin quest curs durant l'entir onn. L'onn da rapport avain nus fatg in gudogn da concern da 185.1 milliuns francs, quai èn 2.7 pertschient dapli che l'onn precedent. Nossa strategia da diversificaziun cun l'extensiun da las fatschentas d'investiziuns e da l'administraziun da la facultad, l'acquisiziun d'ina participaziun da maioritad a l'Albin Kistler AG a Turitg sco er investiziuns en projects innovativs rentabels fan effect. Uschia pudain nus confermar nossa posiziun dominanta sin il martgà grischun. Noss participants profiteschan dal resultat excellent cun ina dividenda da 40 francs per scrit da participaziun. Cun ina relaziun da custs e d'entradas da 49.9 pertschient suenter la deducziun d'amortisaziuns e senza facturs spezials avain nus cuntanschì il 2018 danovamain ina gronda productivitad.

Il futur digital

L'onn da rapport avain nus surlavurà nossa strategia d'interpresa. A basa da pussaivels scenaris fictivs avain nus mess en dumonda las sfidas da la banca e deducì las schanzas e las ristgas. Ina da las grondas sfidas resta la digitalisaziun. La transfurmaziun digitala en la societad ed economia influenzescha pli e pli nossas decisiuns d'interpresa. Per l'ulteriur success s'orientescha nossa strategia perquai tenor las midadas digitalas. Tegnend pass cun il svilup ed investind sistematicamain en novs process, restain nus à jour cun nossa infrastructura tecnologica. Sin il champ da la digitalisaziun avain nus drizzà il 2018 l'attenziun sin dapli mobilitad, dapli segirezza e dapli cussegliaziun.

In e-banking segir

Las midadas digitalas faschain nus avanzar a moda durabla. Emprima prioritad han en quel connex fatschentas da banca quotidianas uschè segiras sco pussaivel. Cun ina procedura da login moderna po nossa clientella da l'e-banking lavurar cun mintga apparat final tenor ils pli auts standards da segirezza, a moda moderna ed independentamain dal lieu. Il medem vala per la pussaivladad da pajar cun ina smartwatch. Cun l'amplificaziun da nossas purschidas electronicas rendain nus pli attent la publicitad a noss digital banking.

Filialas cun ina ferma cussegliaziun

Avant dus onns avain nus introducì en la sedia regiunala a Glion in nov concept cun filialas senza spurtegl classic. L'onn da rapport èn vegnidas transfurmadas era las filialas a Landquart, Domat e Tusaun. A Flem ha la BCG fatg midada en la nova surbajegiada STENNA. En il center da noss nov concept da filialas stattan las hallas da clientella modernas ed ina cussegliaziun intensivada. Nus avain plaschair da las reacziuns per gronda part positivas. Ellas cumprovan ch'igl è stà la dretga decisiun da reagir sin basegns actuals. L'onn 2019 vegnin nus a modernisar nossas sedias regiunalas a Scuol, San Murezzan e Lai.

Fonds d'investiziun cun ina ferma performance

Dapi intgins onns sa posiziunain nus sco banca d'investiziun cun agens products da fond. Il 2018 avain nus lantschà gia noss otgavel fond. Tar tut ils products dain nus paisa a la performance e la segirtad. Uschia èn noss fonds d'investiziuns en aczias sa sviluppads bler meglier l'onn da rapport che lur index u products sumegliants, senza che nus avessan stuì ans exponer a ristgas supplementaras. Quai è stà pussaivel grazia a la cumpetenza professiunala da noss managers da fonds en l'Investment Center BCG. Nus avain cumplettà nossa paletta da purschidas e satisfaschain uschia anc meglier als differents basegns da la clientella. Il nov assistent d'investiziuns online gida nossa clientella a moda simpla da chattar la dretga soluziun d'investiziun.

Noss engaschament e nossa attaschadadad

Sco interpresa da tradiziun grischuna essan nus conscients da nossa responsabladad sociala. Cun noss sponsoring, noss fond da contribuziun per projects culturals, socials, economics e sportivs sco era nossa lavur voluntara ans engaschain nus per il chantun Grischun. Passa 400 dumondas vegnan sustegnidas mintg'onn cun il fond da contribuziun. Plinavant dastgan noss collavuraturs impunder mintg'onn in di da lavur per projects socials. En il rom dal Project en favur dal guaud da muntogna purschain nus ultra da quai jobs da stad attractivs a giuvenils.

Quai mussa: er en il temp digital stat tar nus anc adina l'uman en il center.

Cordial engraziament per Vossa fidaivladad e la confidenza en nus.

Alois Vinzens
CEO

Peter Fanconi
President da banca