Prefaziun
La gronda rentabilitad durant l'onn da rapport 2025 stgaffescha las premissas idealas per la proxima perioda strategica da la BCG 2026–2030.
La BCG po danovamain guardar enavos sin in resultat da fatschenta solid e po terminar cun success la perioda strategica 2021–2025. Ella ha pudì rinforzar sia posiziun sco banca universala chapitalisada fitg bain grazia a fermas ragischs en la regiun, la pretensiun d'adina dapli innovaziun ed in focus consequent sin la persistenza; a medem temp garanteschan la gronda rentabilitad durant l'onn da rapport e la surdada da la batgetta en il presidi da la banca, ch'è succedida retrospectivamain en il dretg mument, ina fitg buna transiziun en la perioda strategica 2026–2030.
L'onn da gestiun 2025 è stà marcà da midadas economicas, geopoliticas e socialas. L'ambient dals tschains midà, ils martgads volatils ed il svilup tecnologic rasant èn stads pretensius per la BCG. En quest ambient è la banca sa cumprovada sco partenaria fidabla per la clientella, l'economia ed il Chantun. Cun lantschar il nov monitor economic ed il nov barometer d'immobiglias ha ella plinavant dà impuls custaivels per analisar e crear l'avegnir en il chantun Grischun.
Il resultat da fatschenta 2025 conferma la fermezza dal model da fatschenta da la BCG ed il grond engaschament da sias collavuraturas e ses collavuraturs. El procura per ina plivalur directa en e per il Grischun e serva al svilup persistent da noss spazi da viver. Uschia accumpogna la BCG sco banca universala dominanta actualmain 61% da tut la clientella privata grischuna e 62% da tut la clientella da fatschenta e d'interpresas pitschnas e mesaunas en il chantun. Il success da la BCG sa mussa er en la dividenda attractiva dapi blers onns che vegn dabun a radund 12'200 participantas e participants; il Chantun sco proprietari principal profitescha d'ina distribuziun e da l'indemnisaziun da la garanzia chantunala. Cun radund CHF 4.86 miu. è la BCG s'engaschada era durant l'onn da rapport per projects culturals, socials, economics u ecologics ed eveniments da sport che stattan a cor ad ella gia dapi blers onns.
En la nova perioda strategica 2026–2030 na sa funda la BCG betg mo sin ina basa gia sa cumprovada; ella s'adattescha er a moda flexibla a midadas tecnologicas e socialas. La strategia actualisada lubescha a la banca da crear valur cun nizzegiar las schanzas dal nov mund professiunal e da las novas tecnologias. La finamira èn ina cussegliaziun cumplessiva d'emprima classa, ina gronda effizienta e fitness d'interpresa.
Malgrà la digitalisaziun èn inscunters persunals fitg impurtants per nus. La proximitad a Vus, preziadas clientas e preziads clients, resta la basa per nossa prestaziun. Per Vossa attaschadadad e Vossa fidanza As engraziain nus cordialmain.
Heinz Huber
President da la banca
Daniel Fust
CEO da la banca